Sucre y Potosi

Am letschte Donnstig haen sich 2 Chicas uf e Waeg nach Sucre gmacht. Nach 15 Stunde Busfahrt sin si mied und greederet in daem wisse Staedtli aako...
Es git ned viel z seh, e baar Kirche, e "mirador" vo wo me die ganz Stadt im Ueberbligg hed und e baar Musee... aber die wisse Hueser und d Waermi gaen doch e suedlaendische Flair... isch wirklich schoen xi...
denni isch es am Maentig morge am 4i los nach Potosi gange... wurum am 4i? zum Gaeld spare :) e Freund vo dr Lisen und si Vater wo in Sucre laebe sin nach Potosi gfahre und haen uns fruendlicherwiis mitgnoh :)

Aako in Potosi haemmer zerst moll e Kaelteschogg ka... 4070 Meter ueber em Meer... doert isch es au im Summer ned wirklich warm... vorallem ned am 7i am morge. Mer haen schnaell unser Hostal gsuecht und sin gad nomol go witerschloofe :)
am Nomittag haemmer s Staedtli besichtigt... git ned viel z seh... isch ganz ganz klei...
am Obe haemmer no e Rundi "Cacho" gspielt (e bolivianischs Wuerfelspiel) und sin denn ned all zu spoot ins Bett, well mer huet in d Mine gange sin...
das isch iidruegglich, beaengstigend und beelaendend...
Me lauft durch Gaeng und trifft uf vieli "Mineros"... die meischte ned aelter als 25...
Mer sin au uf Mineros gstosse, wo mit em Karre d Stei usegschobe haen. 2 Maenner wo 1,5 Tonne stosse mien... *boa*
Ploetzlich isch dr Waeg nur no mit ere Leiterer witer gange. Mer sin oebbe 10 Meter uffegstiege... ned so aagnaeh xi. und wo mer oeb aako sin, hammer miesse e Stuegg (Hoechi oebbe 40 cm) krieche... uf dr ander Site heds e baar Mineros ka (bi oebbe 30 Grad) wo gad e Explosion mit Dynamit vorbereitet haen. Das haemmer aagluegt und denn haemmer dr ganzi Waeg wieder zrugg miesse.
Wo mer in e Gang gange sin und uns dr Guid vo de Krankheite vo de Mineros hed welle verzelle, hoere mer ploetzlich: "bumm bumm" und mega viel Laerm... isch aechd beaengstigend xi (ka me sich biz mit Lord of the Rings in de Mine vorstelle :)) sin denn witergange, wells mega viel Laerm gmacht hed...
Kurz vor em Usgang simemr nomol in e Sitegang ine, wo "el tio" sitzt... dr Gott vo de Mineros... doert hed dr Guid oebbis "gopferet" (Coca und Alkohol) als danke, dass uns nuet passiert isch und uns erklaert wurum keini iiheimische Fraue in d Mine doerfe und wurums z.b. in Oruro Mine git, wo si gar keini Fraue zueloehn...

Jo... wie der sehnd e mega Abendheuer... Foeteli folge!

Besos us Potosi